Oleh: pakpaksim | 21 Februari 2011

KASA “CENG-CENG” JADI RAJA


Oleh : Dayo Sinamo

Ipas sada katika memaing runggu mbelgah ngo manuk-manuk si lot I aur en, imo lako menobatken sada raja tarap  sada jenis manuk-manuk. I utus mo sada manuk-manuk lako ki mong mongken mendahi nasa manuk-manuk, asa roh karina kalaki lako mengekuti runggu idi. Ipas mong-mong I  ibagahken mo ari runggu bahanen I ari beraspati bulan pewaluhken.

Dapet kessa  bulan dekket arina jumpa bali bana, roh mo karinana nasa manuk-maniu mi bekas si enggo I tentuken. Tikan lako mengangkat  sada raja i, ipido pandangen dekket pendapat bakune sientengna terenget penobaten raja manuk-manuk. I tumulai mo narap manuk-manuk si mbelgah na nai. Roh mo Kaliki mendokken, ”aku mo jadi raja, kmumerna aku boi ngkabang ndaoh janah karina ngo manuk-manuk sideban mbiar taba aku. Mella nggo mentas aku, karina manuk-manuk ciboni”, nina maing pendapetna. Tapi roh mo runggu menimbangi kaliki, nina mo “oda ndorok ko jadi jadi raja, kumerna jukut denganmu  ngo I pangan ko,  janah roh kessa ko menter karina ngo kami kipesisi”. Kessa I mongkam nola mo  Enggang mendokken, “aku mo jadi raja, aku ngo si mbelgah na janah sorangku ngo si nggang na, ndaoh deng pe aku enggo I bettoh kalak aku lako roh”., Roh mamo runggu menimbangi  nina  “oda boi kerna mbelgah ngket sora nggang sambaing jadi raja kerna gabe mbiar nola ngo karina dengan-dengan mu”. Kesaa bagi roh mamo Uwo maing pendapetna mendoken “aku mo jadi raja, kerna daging ku mbelgah, sorangku pe nggang, rupangku pe merandal, ceggen kessa jengkas ngo aku mersora, mendungoi, asa ndor kene karina ndungo”. I timbangi runggu mamo pendapetna I mendokken, “oda boi ko jadi raja, kerna ibaing sada rambar buluh ntajem sambaing pe enggo nggettap kerahongmu”.

Enggo piga-piga manuk-manuk maing pandangen, tapi oda deng lot cocok iakap runggu. Kernan nai roh nola mo torngak-torngak nina mo “ aku mo jadi raja, kerna bage sorangku ngo ukurku. Guru dokku-guru dokku, bagi ngo sorangku. I asa patuh mo nahan karina kene mendahi aku”. Tapi roh mamo runggu menimbangi mendokken “ kono pe oda boi jadi raja, kumerna sada rambar timan pe itogongken anak-anak, nggo mo ko dapetsa, tapi guru dokmu nimu karinana”.  Kessa bagidi roh nola mo ndukur nina mo “ aku mo jadi raja aku mene-mene ngo janah sorangku oda pella nggang”. Runggu menimbangi, “makin ko nola, oda boi. Mene-mene ngo ko tuhu, bagima soramu oda nggang, tapi olong lampas dekket katimukmuk ngo panganmu”. Roh nola mamo kerap mendokken, “aku mo jadi raja, kerna bage sorangki mango ukurku. Barang kade ipermasalahken tuk urkuku-tuk urkuku, ningku ngo”, nina ma. Tapi dok runggu menimbangi, kope oda boi jadi raja, kerna oda ko pernah mengula, oda ma pernah merani, tapi page ni deba ngo dak ipangani ko. Asa mella dapet sidasa page ko, ikurung-kurungi ngo kono”.

Enggo mbue manuk-manuk maing pendapetna, tapi sada poda deng tok iakap runggu i. janah oda ne lot ise pang mengasangken dirina mi runggu I, kerna dak tong ngo iakap lot kekurangenna. Kerna enggo karina manuk-manuk I sip, sempusta roh mo cengceng mendokken bagen, aku mo jadi raja, lot alasenku. Kami sikedekna tarap karina manuk-manuk, janah oda mergeggoh. Isa oda kuantusi kami kade man asangkenen name. tap imbue merkelleng ate taba kami. Mentas kessa kami, menter mbue ngo mengekutken kami ipodi nai. Cabi, tasking, kalomaha, bistuak, kurlet bagi ma ribu-ribu, mike pe kami laus karina ngi mengekut. Ingo asa kami makne mbiar marang mike, kerna gabe mbue ngo kami sidalanen”. Bage sibengap mo karina siroh irunggu I, janah kumerna cengceng ndai oda mengasangken kelebihenna, janah iakkui ma kekurangenna oda mboni-mboni, gabe tubuh mo ukur percaya mendahi karina. Janah gabe Sada kata sada arih mo karina manuk-manuk, rebbak mengoangken mo kalaki, cengceng ndai mo ibaing  jadi raja. Kessa I mo asa ibaing gerarna “cengceng raja”. Tapi bagi pe, oda ngo karina manuk-manuk ndai menguei kesepakatan idi, lot mango piga-piga mengalo keputusen idi. Terbettoh kessa bagidi, ibaing runggu imo arih asa mendahi manuk-manuk siso menguei kesepakaten, iabing mo hukumen, asa oda boi nenge kalaki menulusi panganna ipas terang ari, kennah berngin mo. Kumernanai I gancihi mo penengen matana menjadi penengen berngin, makne merpendidiah tikan terang ari. Mnauk-manuk idi ndai imo lengkupa, sibongkel, sibiangsa dekket sidebanna.

Bagi mo cituk sukuten cengceng raja en, janah belli mo kene karina mengarusi lapaten dekket pengantusin arti ni sukuten en. Bage umpama mo kudokken, ndabuh sirimo mungkur, itinggang kayu ibiding dalan. Mendahiklen kene partua singgedang ukur, simunurat en ue ngo mahan ajaren. Lias ate.

 

 

 

 

 

 

 

 

 

 

 

 

 

 

 

 

 

 

“LABA DENG MA”

Oleh Dayo Sinamo

I ngelluh en karina ngo kita mengula ulan ,sinasa terula barang pe terbahan deng.  Oda ngo merleja-leja karina I,bakune mo asa merlaba janah asa mende  kenggeluhen rumah tangganta meraduna. Oda mettoh lejja, oda mentadi, oda murah mendelle asal deng ma keppe ntua daging makne lot geggoh. Tapi bagipe tentu  perlu ngo man jagan kesehaten  ket keselamatan. Lebbe lejja janah mukupen ngo asa kennan laba.

Arnia lot mo  sada partua, menangkih kemenjen ngo ulanna. Ipas sada katika  lako susur mo ia ibatang kemenjenna nai.  I sigih mo sada batang kemenjen silot I rbe – rben, I eket mo plang-plangna dekket  tenali I batang kemenjen na en, asa merduruh merdengan merodong-odong ia. Kessa I balik mo ia mi kuta. Enggo kessa lot sibar empat bulan, laus mo ia  mi delleng mendahi batang kemenjenna, mengagahi tah nggo merduruh  tah oda. I dahi mo  batang sinitinaliken na merkite odong-odong ikin. I idah mo merkire duruh nai janah  lolo mo atena, simpusta mo ia mersurak “o….o…o labangki” nina. Siso pemetohna lot kin keppeken sada balkih medem I teruh batang kemenjen i. Nai tersengget mo balkih ninganna mangkat. termbah mo dekket duruh kemenjen I, gabe I buluti mo balkih I, ngulang mo ia mi napa janah ndabuh mo mi sada namo-namo. I namo I mbue ikan kapperas na, gabe mbirsak mo laena janah mermastaken mo ikan ndai mi darat. Tikan ngulang balkih idi tersengget mamo sada imbo, ndabuh janah menter mate. Laus mo partua en  mendahi mi napa-napai  idah mo balkih ndai nggo mate. Lolo mamo atena janah  I dokken ipas ukurna “laba deng ma kppe”, katena.  Idah nola ma mo kepperas ndai nggo darak I darat, laba deng ma, katena. Kessa i idah nola ma sada imbo nggo mate ”laba deng ma” nina tole. I lapah lapah mo  balkih deket imbo I, janah I pilihi mo ikan kaperras sibagakna, I tabah mo sada buluh menguda mahan tinali ( belembang ) janah I taku. I bagas mbalar ipe mbue ma lako mebellah buluh I, I sampet  mo sada manuk manuk janah ndabuh laba deng ma, Kessa I Itabah mo sada nai buluh tua mahan lanja –  lanja  moras mo buluh I gabe I pantul mo I tanoh sada peddi laba deng ma nina.

I tustusi mo gule ndai janah I rakuti mi lanja- lanja na lako balik mo ia. I persan mo lanja nai mertuhu tapi tuhu  oda piga langkah deng ia langkahken tersondalih mo nehena janah tergempang. Gabe I dendeni embahen nai mo ia janah mate. Isa oda karina laba kppe jadi olih. Janah oda bahan menghakai. Sibar siterpersan ngo kessa asa olih.

 


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: